झापा- गत आर्थिक वर्ष २०७९/८० मा काँकडभिट्टा नाकाको व्यापार घाटा उच्च देखिएको छ। यस नाकाबाट भारत, चीन, बंगलादेश र भुटानसँग व्यापार हुने गर्छ। मेची भन्सार कार्यालयका अनुसार गत आवमा मात्रै यस नाकाको व्यापार घाटा २४ अर्ब ३१ करोड ९४ लाख ४१ हजार रूपैयाँभन्दा बढी छ।

गत आवमा काँकडभिट्टा नाका भइ विभिन्न देशबाट ४६ अर्ब ३६ करोड १३ लाख ३४ हजार रूपैयाँ बराबरको सामान आयात भएको छ भने सोही अवधिमा सो नाकाबाट जम्मा २२ अर्ब चार करोड १८ लाख ९३ हजार रूपैयाँ बराबरको सामान निर्यात भएको मेची भन्सार कार्यालयका प्रमुख रामप्रसाद रेग्मीले जानकारी दिए।

उनका अनुसार यस नाकामार्फत बंगलादेशबाट पाँच अर्ब ६५ करोड २० लाख ६५ हजार रूपैयाँको सामान आयात भएको छ भने ४७ करोड ११ लाख ५३ हजार रूपैयाँको सामान निर्यात भएको छ। विगत पाँच वर्षदेखि यस नाकाबाट हुने बंगलादेशसँगको व्यापार घाटा भएको छ।

साथै समीक्षा अवधिमा भुटानसँग एक अर्ब ५६ करोड ८८ लाख ३० हजार रूपैयाँ बराबरको सामान आयात भएको छ भने ५२ करोड दुई लाख ३६ हजार रूपैयाँ बराबरको निर्यात भएको छ। सोही अवधिमा भारतबाट ३३ अर्ब १८ करोड ८७ लाख ५६ हजार रूपैयाँको सामान आयात भएको छ भने १९ अर्ब ८१ करोड २३ लाख ७१ हजार रूपैयाँ बराबरको निर्यात भएको छ।

गत आवमा यस नाकाबाट चीनसँगको व्यापार घाटा भने शतप्रतिशत प्रतिशत छ। चीनबाट तीन अर्ब छ करोड १० लाख १२ हजार रूपैयाँ बराबरको सामान आयात हुँदा निर्यात शून्य छ।

नेपालबाट अदुवा, अलैँची, चिया, अम्रिसो, फलाम तथा फलामका सामग्री, प्लाइउड, छुर्पी, दलहन, धातुका सामान, पिनालगायत वस्तु यी देशमा निर्यात हुँदै आएको छ। साथै यस नाकाबाट कोइला, पेट्रोलियम पदार्थ, पशुको आहाराको कच्च पदार्थ, जुट तथा जुटका उत्पादन, ड्राइफुट्स, भटमास, तोरी नरिवल, चिप्स, मार्बल, प्लास्टिकका कच्चापदार्थ, तरकारी, आलु, कपडालगायत सामान आयात हुने गरेको भन्सार कार्यालयको भनाइ छ। रासस