काठमाडौं- त्रिभुवन अन्तर्राष्ट्रिय विमानस्थलको भन्सारबाट जाँचपास भएको सुन ठूलो परिमाणमा जफत भएपछि भन्सारमा जाँचपास हुन बाँकी सामानमा समेत सुन हुनसक्ने भन्दै विशेष अनुसन्धान सुरू गरिएको छ। उही कम्पनीको सामान जाँचपास हुन बाँकी रहेको देखिएपछि राजस्व अनुसन्धान विभागले विशेष अनुसन्धान सुरू गरेको हो।
राजश्व अनुसन्धान विभागले भन्सार जाँच पास भएर निस्केको झण्डै एक सय किलो सुन मंगलबार बरामद गरेको थियो। हङकङको क्याथे प्यासिफिक एयरलाइन्सबाट आएको सामान (ब्रेक शु)मा राखेर उक्त सुन ल्याइएको पाइएको हो। त्यसरी सामान ल्याउने रेडी ट्रेडका सञ्चालक दिलिप भुजेल र रामकुमार भुजेलसहित भन्सार एजेन्ट राजेन्द्र राईसहित ६ जनालाई पक्राउ गरेर अनुसन्धान अघि बढिरहेको छ।
रेडी ट्रेड कम्पनीकै सामान मंगलबारभन्दा अघि पनि कहिले ३० किलो कहिले ३५ किलोका दरले जाँचपास भएर बाहिरिएको र अझै जाँचपास हुन बाँकी १३ कार्टुनभन्दा बढी सामान गोदाममा नै रहेको विमानस्थल भन्सार कार्यालय स्रोतले जानकारी दिएको छ।
क्याथे प्यासिफिकको विमानबाट आएको सुन मंगलबार दिउँसो २ बजेतिर नै भन्सार पास भएको थियो। त्यसको तीन घण्टापछि सिनामंगलमा ट्याक्सीबाट बरामद भएको थियो। अहिले यही रेडी ट्रेडका थप सामानमा पनि सुन हुनसक्ने आशंकाले अनुसन्धान अघि बढेको छ।
अवैध सुन भित्रिएपछि भन्सार विभागले छानबिन समितिसमेत बनाएको छ। भन्सार विभाग अनुसन्धान शाखाका निर्देशक मानबहादुर पौडेलको नेतृत्वमा छानबिन समित गठन भएको विभागका निर्देशक एवं सूचना अधिकारी पुण्यविक्रम खड्काले जानकारी दिएका छन्। समितिले विमानस्थलको भन्सार जाँचपासमा क-कसको संलग्नता भएको भन्नेबारे छानबिन गर्ने छ।