रोल्पा- रोल्पामा संघ र प्रदेशबाट प्राप्त पुँजीगत बजेटमध्ये ठूलो हिस्सा खर्च हुन नसकी फिर्ता गएको छ। जिल्लाको पुँजीगत विकासका लागि आएको रकममध्ये ५६ करोड १५ लाख ९० हजार रूपैयाँ बजेट खर्च हुन नसकेर फिर्ता गएको हो।
जिल्लामा संघतर्फ ८३ करोड २३ लाख ४३ हजार र प्रदेशतर्फ एक अर्ब ३२ करोड ८४ लाख १८ हजार रूपैयाँ गरी कुल दुई अर्ब १६ करोड सात लाख ६१ हजार रूपैयाँ बजेट प्राप्त भएको थियो।
प्राप्त बजेटमध्ये संघतर्फ ५७ करोड ७४ लाख ७७ हजार र प्रदेशतर्फ एक अर्ब दुई करोड १६ लाख ८३ हजार गरी कुल एक अर्ब ५९ करोड ९१ लाख ७० हजार रूपैयाँ खर्च भएको कोष तथा लेखा नियन्त्रण कार्यालय रोल्पाका सूचना अधिकारी हेमन्तराज आचार्यले जानकारी दिए। उनका अनुसार खर्च हुन नसकेर फिर्ता गएको बजेटमध्ये संघको २५ करोड ४८ लाख ५५ हजार र प्रदेशको ३० करोड ६७ लाख ३४ हजार रूपैयाँ रहेको छ। उक्त रकम कुल बजेटको करिब २६ प्रतिशत हो।
जिल्लामा संघतर्फ पाँच अर्ब ८३ करोड २६ लाख ९० हजार र प्रदेशतर्फ ७९ करोड ७३ लाख ४५ हजार गरी चालुतर्फ छ अर्ब ६३ करोड ३५ हजार रूपैयाँ प्राप्त भएको थियो। चालुतर्फ प्राप्त बजेटमध्ये संघको पाँच अर्ब ४० करोड २२ लाख नौ हजार र प्रदेशतर्फ ६२ करोड ७४ लाख ४४ हजार गरी कुल छ अर्ब दुई करोड ९६ लाख ५४ हजार रूपैयाँ खर्च भएको छ। रासस