काठमाडौं- सांसदहरुले दैनिक उपभोग्य वस्तुमा करको दायरा नबढाउन सुझाव दिएका छन्।
प्रतिनिधिसभाको आज बसेको बैठकमा आर्थिक विधेयक, २०८० माथिको छलफलका क्रममा सांसदहरुले आलु र प्याजलगायत दैनिक उपभोग्य वस्तुमा कर नबढाउन माग गरेका हुन्।
सांसद भगवती चौधरीले पनि दैनिक उपभोग्य वस्तुमा कर नबढाउन माग गरेकी हुन्। उनले आत्मनिर्भर नभएका वस्तुको आयातमा कर बढाउन नहुने धारणा राखिन्। सांसद रञ्जुकुमारी झाले पनि आलु र प्याजमा लागेको कर हटाउन माग गरिन्।
सांसद रेखा यादवले पुर्खौली घरजग्गामा लाभकर हटाउनुपर्ने माग गरिन्। सांसद अमृतलाल राजवंशीले विदेशबाट मोबाइल फोन भित्र्याउँदा लाग्ने करले वैदेशिक रोजगारमा गएका श्रमिक मारमा परेको बताए। रासस