काठमाडौं- काठमाडौं महानगरपालिकाभित्रका सबै सहकारी संस्थाहरूलाई आवश्यक विवरण उपलब्ध गराउन महानगरले निर्देशन दिएको छ।
महानगरकापालिकाले सार्वजनिक सूचना जारी गर्दै ऐन अनुसारको विवरण बुझाउनका लागि ३० दिने अल्टिमेटम दिएको हो।
काठमाडौँ महानगरपालिका सहकारी ऐन, २०७४ को दफा २८ को उपदफा २ ले संस्थाको साधारण सभा प्रत्येक आर्थिक वर्ष समाप्त भएको मितिले ६ महिनाभित्र बोलाउनुपर्ने, दफा ५४ को उपदफा १ ले आर्थिक वर्ष समाप्त भएको मितिले बढीमा ३ महिनाभित्र प्रचलित कानून बमोजिम इजाजत प्राप्त लेखा परीक्षकबाट संस्थाको प्रत्येक आर्थिक वर्षको लेखा परीक्षण गराउनुपर्ने र दफा ५२ ले तोकिए बमोजिमका विवरणहरू बुझाउनुपर्ने व्यवस्था गरेको छ।
कानून अनुसारको विवरण सबै संस्थाले नबुझाएकाले महानगरले सार्वजनिक सूचना जारी गरेरै निर्देशन दिएको हो। यदि तोकिएको समयमा विवरण नबुझाएमा कानून अनुसार कारबाही हुने महानगरले चेतावनी दिएको छ।
जरिवानासँगै सहकारीको विघटन वा दर्ता खारेजीसम्म हुनसक्ने महानगरले चेतावनी दिएको छ।