काठमाडौं- कृषि विकास कार्यालय, मुगुका तत्कालीन निमित्त कार्यालय प्रमुख पंचलाल बुढासहित ६ जनाविरुद्ध भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगले प्रमुख बुढा, तत्कालीन सब इन्जिनियर राजेन्द्र शाही, उपभोक्ता समितका अध्यक्ष हस्तबहादुर रोकाया, कोषाध्यक्ष अमनाकुमारी रोकाया र सचिव भुवन रावलसहित ६ जनाविरुद्ध मंगलबार विशेष अदालत काठमाडौंमा भ्रष्टाचार मुद्दा दायर गरेको हो।
प्रमुख बुढाले मुगुको खत्याड गाउँपालिका-४ स्थित गुगियाचौरमा प्रदेश सरकारबाट प्राप्त रकम आव ०७६/०७७ मा सकिनुपर्ने योजनाको कामै नगरी सम्पन्न भएको प्रतिवेदन तयार गरी बिल भुक्तानी लगायतका कार्य गरी आर्थिक अनियमितता गरेको उजुरी परेपछि अख्तियारले अनुसन्धान सुरु गरेको थियो।
अनुसन्धानका क्रममा बुढाले आव ०७६/०७७ मा सञ्चालन भएको उक्त गाउँपालिकास्थित खिराचौर कृषि सिँचाइ निर्माण आयोजना अधुरा र समयमा काम नगर्ने उपभोक्ता समिति तथा अन्य संलग्नहरुलाई नियमानुसार कारबाही गर्नुपर्नेमा सो नगरी निर्माणस्थलमा भए गरेको कार्य भन्दा बढी तथा साइटमा नगरे/नगराएको परिमाणको कार्य भएको भनी नापी किताबमा चढाई सोही बमोजिमको कार्य स्वीकार प्रतिवेदन तयार/प्रमाणित गरी भुक्तानीको लागि टिप्पणी उठाउन लगाई १२ लाख ८३ हजार ३४ रूपैयाँ उपभोक्ता समितिलाई बढी भुक्तानी दिएको पाइएको छ। उनलाई सोही रकम बराबरको बिगो कायम गरी अख्तियारले मुद्दा दायर गरेको हो।
यस्तै यसमा संलग्न सब इन्जिनियर शाही, उपभोक्ता समितका अध्यक्ष रोकाया लगायतलाई पनि १२ लाख ८३ हजार ३४ रूपैयाँ रकम बिगो कायम गरी विशेष अदालतमा भ्रष्टाचार मुद्दा दायर भएको छ।