काठमाडौं- सर्लाहीको बलरा नगरपालिकाका तत्कालीन जनस्वास्थ्य निरीक्षक (छैठौँ तह) तथा हाल सातौँ तहका कौशलेचन्द्र मिश्रविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले गैरकानूनी सम्पत्ति आर्जन गरी भ्रष्टाचार गरेको भन्दै मंगलबार मिश्रविरुद्ध एक करोड ३० लाख ४५ हजार ७ सय ६० रूपैयाँ बिगो कायम गरी विशेष अदालत काठमाडौंमा मुद्दा दायर गरेको हो। 

अख्तियारका अनुसार मिश्रले सार्वजनिक पदमा बहाल रहँदा स्रोत नखुलेको सम्पत्ति आर्जन गरेको भन्ने उजुरी निवेदन सम्बन्धमा अनुसन्धान हुँदा उनले सेवा प्रवेश गरेको ०५७ देखि ०७८ सम्मको अवधिमा उनको पारिश्रमिक बचत, भत्ता लगायतबाट प्राप्त रकम एक करोड १३ लाख ४५ हजार ८ सय हुन आउँछ। 

सो अवधिमा उनको खर्च भने दुई करोड ४३ लाख ९१ हजार पाँच सय रूपैयाँ देखिएकाले खर्चको तुलनामा प्राप्त आम्दानी एक करोड ३० लाख ४५ हजार सात सय ६० रूपैयाँ बराबरको खर्च तथा लगानीको वैधानिक स्रोत खुल्न नसकेको भन्दै अख्तियारले सोही रकमबराबरको बिगो कायम गरी मुद्दा दायर गरेको हो। 

गैरकानूनी रूपमा आर्जन गरेको सम्पत्ति उनको नाममा दर्ता रहेको सम्पत्तिबाट जफत गर्न समेत अख्तियारले मागदाबी गरेको छ। मिश्रले गैरकानुनी रुपमा आर्जन गरेको सम्पत्ति र सोबाट बढेबढाएको सम्पत्तिसमेत आफ्नी एकासगोलकी पत्नीहरू सरोज कुमारी र तुलसी कुमारी मिश्र शर्माको नाममा राखेको देखिएको अख्तियारले जनाएको छ। उनीहरुलाई समेत अख्तियारले  प्रतिवादी कायम गरी मुद्दा दायर गरेको हो।