काठमाडौं- काठमाडौं महानगरपालिकाका मेयर बालेन्द्र साह 'बालेन' ले बहाल कर संकलनमा संघीय सरकारले लाेभ देखाउँदा स्थानीय तह र करदाता समस्यामा परेको बताएका छन्।
उनले संविधानले दिएको अधिकार स्थानीय सरकारलाई निर्वाध प्रयोग गर्ने वातावरण तयार गरेर समस्या समाधान गरिदिन संघीय सरकारलाई आग्रह समेत गरेका छन्।
महानगरपालिकाले स्थानीय तहअन्तर्गत रहेको घर बहाल कर उठाउने कार्यका लागि सहजीकरण गरिदिन आग्रह गर्दै राष्ट्रिय प्राकृतिक स्रोत तथा वित्त आयोगलाई पत्र समेत पठाएको छ। मेयर साहको हस्ताक्षर रहेको उक्त पत्रमा संघीय सरकारले काठमाडौं महानगर क्षेत्रभित्र हालसम्म उठाएको सबै कर फिर्ता गर्नुपर्ने समेत उल्लेख छ।
'स्थानीय तहको एकल अधिकारको रुपमा अधिकारको सूचीमा समावेश रहेको व्यक्ति वा संस्थाको घर बहाल कर उठाउन पाउने विषयमध्ये संस्थाको घरबहाल कर उठाउन पाउने विषयमा नेपाल सरकार मातहतका आन्तरिक राजस्व कार्यालयहरुबाट भइरहेको हस्तक्षेप काठमाडौं महानगरलाई स्वीकार्य छैन', पत्रमा उल्लेख छ।