कर्णाली- कर्णाली प्रदेशको राजधानी वीरेन्द्रनगरमा आजदेखि नगर माइक्रो बस सेवा सञ्चालनमा आएको छ। सेवा सञ्चालनमा आएसँगै २० रुपैयाँमा वीरेन्द्रनगर घुम्न सकिने भएको हो।

आज वीरेन्द्रनगर नगर माइक्रोबस सेवाको उद्घाटन गर्नुहुदै नरपालिकाका प्रमुख मोहनमाया ढकालले सहुलियतमा नगर बस सेवा आरम्भ भएसँगै नगरवासीलाई सहज हुने बताए। नागरिकको आवश्यकतानुसार नगर माइक्रो बस सेवाले सुरक्षित र भरपर्दो सेवा प्रदान गर्ने विश्वास व्यक्त गर्दै उनले सुरक्षित वीरेन्द्रनगर बनाउने अभियानमा नगरपालिका लागेको बताए। 

व्यवसायीका आवश्यक मागका सम्बन्धमा नगरपालिका गम्भीर रहेको बताउँदै नगरप्रमुख ढकालले अटोरिक्साको मनलाग्दी भाडाका कारण आजित बनेका नागरिकलाई नगर माइक्रो सेवाले राहत दिने विश्वास व्यक्त गरे। उनका अनुसार नगर माइक्रो बस सेवा संयुक्त काउन्टरबाट सञ्चालन हुनेछ।

वीरेन्द्रनगरमा एक चोकबाट अर्को चोकसम्म पुग्न भाडादर २० रुपैयाँ कायम गरिएको सुर्खेत काँक्रेविहार यातायात प्रालिका अध्यक्ष रमेश सापकोटाले बताए।

बस  मंगलगढी-काँक्रेविहार, मंगलगढी-एयरपोट चोक-बामेखोला, मंगलगढी-गणेशचोक-आँखा अस्पताल चोक हुँदै कालिञ्चोक-नेवारे पिपिरा, गणेशचोक-प्रदेश अस्पताल-बांगेसिमल रुट जोडिने र गणेश चोक-कारागार-टेलिकम हुँदै कपासे रुटसमेत थप गरिने उनले जानकारी दिए। 

यात्रुलाई सहज सेवा दिनका लागि सहुलियत भाडादर कायम गरिएको अध्यक्ष सापकोटाले बताए। उनका अनुसार अहिले मुख्यतः चार लेन सडकको धुलियाबिटबाट मंगलगढी-यरिचोक हुँदै मूलपानी चोकबाट प्रदेश अस्पताल भएर बांगेसिमलसम्म पुग्ने गरी माइक्रो बस सेवा सञ्चालन गरिएको छ। दश माइक्रो बस १०-१० मिनेटको फरकमा छुट्याइने छ।

सुर्खेतमा अटोरिक्सामा प्रतिकिलोमिटर ५० देखि एक सय ५० रुपैयाँसम्म भाडा लिने गरेकामा नगर बस सेवा सञ्चालनमा आएपछि राहत हुने खबरले यहाँका नागरिकले सेवाको स्वागत गरेका छन्। रासस