काठमाडौं- चालु आर्थिक वर्षको फागुन मसान्तसम्म देशभर १ सय ४ किलोमिटरमात्र नयाँ सडक निर्माण भएको छ। सरकारले आइतबार सार्वजनिक गरेको आर्थिक सर्वेक्षणअनुसार चालु आवको ८ महिनामा १ सय ४ किलोमिटरमात्र नयाँ सडक बनेको हो।
यो अवधिमा ३ सय १६ किलोमिटर सडक ग्रावेल र २ सय ४८ किलोमिटर सडक कालोपत्रेमा स्तरोन्नति भएइको छ। साथै ८ हजार २ सय ५४ किलोमिटर सडक नियमित तथा पटके मर्मत भएको र २ सय ७८ किलोमिटर सडक आवधिक मर्मत भएको सर्वेक्षणमा उल्लेख छ।
चालु आवको ८ महिनामा देशभर ७५ वटा सडक पुल निर्माण भएका छन्।
२०७९ फागुनसम्ममा देशभर १७ हजार ४ सय ८० किलोमिटर कालोपत्रे, ७ हजार ९ सय ६५ किलोमिटर ग्रावेल र ८ हजार ६ सय ६४ किलोमिटर कच्ची सडक गरि हालसम्म संघीय सरकारबाट निर्माण भएका सडकको लम्बाई ३४ हजार १ सय किलोमिटर पुगेको छ। २०७९ असारसम्ममा संघीय सरकारले बनाएको कुल सडकको लम्बाई ३३ हजार ९ सय ९६ किलोमिटर थियो।
आर्थिक वर्ष २०७८/७९ मा २ सय ८० किलोमिटर नयाँ सडक निर्माण भएको थियो। सो अवधिमा ३ सय ३५ किलोमिटर सडक ग्रावेलमा स्तरोन्नति भएको र ६ सय ८१ किलोमिटर सडक कालोपत्रेमा स्तरोन्नति भएको थियो।
सो अवधिमा ७ हजार ८ सय किलोमिटर सडक नियमित र पटके मर्मत भएको थियो भने २ सय ५० किलोमिटर सडकको आवधिक मर्मत गरिएको थियो। सो आवमा २ सय ८२ वटा पुल निर्माण भएको आर्थिक सर्वेक्षणमा उल्लेख छ।
