गलेश्वर- वसन्त ऋतुको मौसम। छर्लंगै खुलेको आकाश। उत्तरतर्फका सेताम्ये हिमाल। जंगलभरि राताम्ये भएर फुलेका लालीगुराँस। लालीगुराँसको छेडोबाट हिमाल हेर्दै रमाइरहेका पर्यटक।

म्याग्दीको पर्यटकीयस्थल घोडेपानी र पुनहिलको यो दृश्यले यहाँ पुग्नेको मात्र होइन त्यो दृश्यको भिडियो तथा तस्वीर हेर्नेकोसमेत मन रोमाञ्चक बनाउँछ। चक्रीय अन्नपूर्ण पदमार्गमा पर्ने घोडेपानी र पुनहिलबाट आँखै अगाडि हिमशृङ्खला र सूर्योदयको मनोरम दृश्यावलोकनका लागि अहिले आन्तरिक तथा बाह्य पर्यटकको भिड लागेको छ।

समुन्द्री सतहबाट ३ हजार २ सय १० मिटर उचाइमा रहेको पुनहिलमा वसन्त ऋतुसँगै पर्यटकको भिड लागेको हो। अन्नपूर्ण संरक्षण क्षेत्रको गुराँसे जंगलमा १९ प्रजातिका गुराँस पाइन्छन्। घोडेपानीदेखि एक घण्टाको पैदल दूरीमा उकालो हिँडेपछि पुगिने पुनहिलमा अहिले पर्यटकको भिड लागेको स्थानीय सुरेन गुरुङले जानकारी दिए।

धौलागिरी, नीलगिरि, अन्नपूर्ण, माछापुच्छ्रे हिमाल हेर्न आन्तरिक तथा बाह्य पर्यटकको भिड लागेको घोडेपानी प्रहरीचौकीले जनाएको छ। प्रहरी सहायक निरीक्षक सन्तोष भुसालका अनुसार पुनहिलबाट आठ हजार मिटरभन्दा अग्ला मनासलु, अन्नपूर्ण र धौलागिरि हिमालको दूरीमा पर्ने झण्डै २० भन्दाबढी हिमचुचुरालाई नजिकबाट नियाल्न सकिन्छ। अहिले दैनिक प्रतिदिन तीन सयदेखि पाँच सयसम्म आन्तरिक तथा बाह्य पर्यटक घोडेपानी र पुनहिल आउने गरेका छन्।

धेरैजसो पर्यटक घान्द्रुक एवं अन्नपूर्ण बेसक्याम्प (एबीसी) बाट फर्कने तथा पोखराबाट घोडेपानी आएर घान्द्रुक र एबीसीतिर जाने गरेका उनले जानकारी दिए। म्याग्दीको अन्नपूर्ण गाउँपालिका-६ मा अवस्थित पर्यटकीयस्थल घोडेपानी र पुनहिलमा पर्यटकको चहलपहल सुरु हुन थालेपछि होटल व्यवसायी उत्साहित बनेका छन्। वसन्त ऋतुको अनुकूल मौसममा आन्तरिक पर्यटक प्राकृतिक सुन्दरतामा रमाउन पुनहिल पुग्न थालेका हुन्। मौसममा सुधार आएसँगै यस क्षेत्रको भ्रमणमा आउने अन्तरिक तथा विदेशी पर्यटकको संख्यामा वृद्धि हुन थालेको होटल व्यवसायीले बताएका छन्।

विश्वप्रसिद्ध चक्रीय अन्नपूर्ण पदमार्गले समेटिएको घोडेपानी र पुनहिल क्षेत्रमा पर्यटकको चहलपहल बढ्न थालेपछि होटल व्यवसायी उत्साहित भएको घोडेपानी टोल सुधार समितिका अध्यक्ष विरेन पुनले बताए। चक्रीय अन्नपूर्ण पदमार्गमा पर्ने पुनहिलबाट हिमशृङ्खला र सूर्योदयको सुन्दर दृश्यावलोकन गर्न पाइन्छ। घोडेपानीदेखि पुनहिलसम्म पुग्न पदमार्ग निर्माण गरिएको छ।

वसन्त ऋतुको सुरुवातसँगै पर्यटकको आगमन बढेको घोडेपानी होटल व्यवस्थापन समितिका अध्यक्ष मीना पुनले बताए। पुनहिलमा बिहानीको सूर्योदयसँगै आँखै अगाडि देखिने हिमशृङ्खलाको अवलोकनका लागि पर्यटक पुग्ने अन्नपूर्ण-५ शिखका बासिन्दा सुरेन गुरुङले जानकारी दिए। सूर्योदयको दृश्यावलोकनसँगै पूर्वदेखि पश्चिमसम्म नै लहरै देखिने हिमचुचुराको दृश्यले पर्यटक खुसी भएर फर्कने गरेको गुरुङले बताए।

घोडेपानीमा सानाठूला गरी ३० होटलमा चार सय शय्या छन्। प्राकृतिक सौन्दर्यमा रमाउन आएका आन्तरिक पर्यटकको भिडले तातोपानीका होटल तथा गेस्ट हाउस पनि खचाखच भरिएका छन्। हिमाल तथा गुराँसकै कारण घोडेपानी र पुनहिल चिनिएका छन्। प्रकृतिको सदाबहार सौन्दर्य, हिमशृङ्खलाको आकर्षण, स्थानीय सहयोगी तथा सेवा भावनाले घोडेपानी र पुनहिलको समृद्धि चुलिँदै गएको घोडेपानीका होटल व्यवसायी एवं अन्नपूर्ण गाउँपालिकाका पूर्वअध्यक्ष क्या डमबहादुर पुनले बताए।

'पर्यटकका लागि मगर, गुरुङ बस्ती, कला, संस्कृति जीवनशैली, हिमशृङ्खला, सूर्योदय, लालीगुराँस जंगल पदमार्गको मुख्य विशेषता हो। घान्द्रुक घोडेपानी क्षेत्रमा चिनियाँ, फ्रेन्च, कोरियन र मलेसियन पर्यटक बढीमात्रामा पुग्ने गरेका छन्', उनले भने।

म्याग्दी, मुस्ताङ, कास्की, लमजुङ र मनाङलाई समेटिएको अन्नपूर्ण संरक्षण क्षेत्र भ्रमण गर्न पछिल्लो समय सार्क राष्ट्रका पर्यटकलाई प्रतिव्यक्ति एक हजार र तेस्रो मुलुकका पर्यटकलाई प्रतिव्यक्ति तीन हजार रूपैयाँ शुल्क लिने गरिएको छ। ‍

कास्कीको पोखरा-नयाँपुल, घान्दु्रक हुँदै घोडेपानी तथा म्याग्दी सदरमुकाम बेनी-तातोपानी, घारा, शिखदेखि घोडेपानी र नागी-महरेडाँडाबाट पुनहिल पुग्न सकिन्छ। अन्नपूर्ण पदयात्रा मार्ग सुरु भएपछि बाटो हिँड्ने पर्यटकका लागि चिया, नास्ता खुवाउन खुलेका साना होटल पर्यटकको बाक्लो आगमन बढ्दै गएपछि सुविधासम्पन्न होटल बनेका छन्। पर्यटक आगमन बढ्न थालेपछि प्रहरीले सुरक्षाका लागि गस्ती गर्न थालेको छ। अन्नपूर्ण पदयात्रा मार्ग विश्वका उत्कृष्ट १० गन्तव्यभित्र पर्छ।

म्याग्दीको घोडेपानी, पुनहिल, कास्कीको घान्द्रुक, लान्द्रुक, एबीसी क्याम्प, घम्पुसलगायत पर्यटकीयस्थल पदयात्राको आकर्षण बनेको छ। वीरेठाँटीबाट भित्रिएका आधाजसो पर्यटक छोमरोङ हुँदै अन्नपूर्ण आधारशिविर अर्थात् एबीसी पुग्ने गर्छन्।

पदयात्रामा जाने पर्यटकको आवास र खानाका लागि घोडेपानीमा सुविधासम्पन्न होटल सञ्चालनमा छन्। पर्यटकको आवागमन बढ्दै गएपछि होटल व्यवसायीलेसमेत सेवासुविधालाई गुणस्तरीय बनाउँदै लगेका स्थानीय होटल व्यवसायीले बताएका छन्।

घोडेपानीमा सानाठूला गरी ३० होटलमा चार सय शय्या क्षमता छ। कहिलेकाहीँ धेरै पर्यटक भएपछि होटलको आँगनमा टेन्ट राखेर पनि बास दिने गरेको घोडेपानी होटल व्यवस्थापन समितिका अध्यक्ष पुनले बताए।

घोडेपानी पुगेका धेरै पर्यटक हिमाल पारीको पर्यटकीय जिल्ला मुस्ताङको प्रवेशद्वारका रूपमा चिनिएको म्याग्दीमा धौलागिरी र अन्नपूर्ण हिमाल आरोहण, प्राकृतिक तातोपानी कुण्ड, अन्नपूर्ण धौलागिरि, धौलागिरि सेञ्चुरी, धौलागिरि चक्रीय, धौलागिरि आइसफल, टोडके, रुप्से झरना, अन्धगल्छी, गलेश्वर, बेनी बजारलगायत विभिन्न धार्मिक, प्राकृतिक र ऐतिहासिकस्थलको भ्रमणमा पर्यटक पुग्ने गर्छन्। रासस