काठमाडौं - बुद्ध एयरले पछिल्लो पाँच वर्षमा आफ्ना पाइलट तथा इन्जिनियरको तालिममा ५८ करोड रुपैयाँ लगानी गरेको छ। 

बुद्धले पछिल्लो पाँच वर्षमा तालिमका लागि ५८ करोड ३१ लाख ६२ हजार रुपैयाँ खर्च गरेको हो। यो कम्पनीले सन् २०१७/०१८ देखि सन् २०२२ सम्म गरेको खर्चको विवरण हो। 

पाइलट तथा प्राविधिकहरूले जति धेरै तालिम तथा प्रशिक्षण पाए उति धेरै सुरक्षित उडान हुने कम्पनीको विश्वास रहेको र सोहीअनुसार लगानी गरिएको उल्लेख गरेको छ। 

कम्पनीले सन् २०१७/१८ मा १२ करोड रुपैयाँ लगानी गरेको थियो। त्यसपछिका वर्षहरूमा प्राविधिकहरूको नयाँ भर्ना तथा आवश्यकताका आधारमा यस्तो लगानी हुँदै आएको छ। 

बुद्धसँग अहिलेसम्म तीनप्रकारका जहाज छन्। एटीआर७२-५००, एटीआर ४२-३२० र बीचक्राफ्ट छन्। स्थापनाकालमा ल्याइएका बीचक्राफ्ट जहाज भने बुद्धले विस्थपित गरिसकेको छ।