काठमाडौं- चारजना क्याबिन क्रुको करार नवीकरणको विषयलाई लिएर नेपाल एयरलाइन्सको दिल्ली उडान प्रभावित भएको छ। उनीहरूको नवीकरण बिनासर्त हुनुपर्ने माग राख्दै क्याबिन क्रुले आन्दोलन गर्दा उडान प्रभावित भएको छ।
त्रिभुवन अन्तर्राष्ट्रिय विमानस्थल कार्यलयका प्रमुख प्रेमनाथ ठाकुरका अनुसार नेपाल एयरलाइन्सको कारण दिल्ली उडान प्रभावित भएको हो। 'नेपाल एयरलाइन्का कारण बारम्बार विमानस्थलको छविमाथि दाग लागेको छ। विमानस्थलमा कर्मचारीको दादागिरी देखिएको छ, उनले भने, ' १:४५ को उडान साढे ३ बजेका लागि सारिएको छ। यात्रुबाट कुनै गतिविधि भएमा त्यसको जिम्मेवार निगम हुनु पर्छ।'
दिल्ली उडानका लागि २ सय ५६ जना यात्रुले बोर्डिङ पास लिएका छन्।
मापदण्डअनुसार क्याबिन क्रुको नवीकरणमा चारजना नपरेपछि उनीहरूले विरोधमा उडान नै रोकेका हुन्। प्रजिता कार्की, प्रदा कार्की, आरती महर्जन र स्मिता गुवाजुको नवीकरण रोकिएको थियो।
करारमा रहेर १५ वर्ष सेवा गरेका चार विमान परिचारिकालाई बिनाकारण सेवामा निरन्तरता नदिएको विरोधमा उनीहरूले सेवा नै अवरोध गर्दा उडान प्रभावित भएको हो।
