काठमाडौं- नेकपा एमालेले मंसिर चार गते हुने प्रतिनिधिसभा र प्रदेश सभाको निर्वाचनका लागि घोषणापत्र सार्वजनिक गरेको छ।
एमाले अध्यक्ष केपी शर्मा ओलीले घोषणापत्रको अनावरण गरेका छन्। एमालेले चुनाव जितेर आफ्नो सरकार बनेको अवस्थामा गर्ने काम र आउने परिणामको दाबीसहित चुनाबी घोषणापत्र ल्याएको छ।
एमालेले आगामी पाँच वर्षमा नेपालको कुल गार्हस्थ उत्पादन एक सय खर्बको बनाउने घोषणा गरेको छ।
त्यस्तै एमालेले पाँच वर्षमा नेपालीको प्रतिव्यक्ति आम्दानी २ हजार ४ सय अमेरिकी डलर, सामाजिक सुरक्षा भत्ता बढाउने, ६० वर्ष उमेर पार गरेका नागरिकलाई उच्च रक्तचाप र मधुमेहको औषधि, नि:शुल्क स्यानिटरी प्याड दिने घोषणा गरेको छ। स्यानिटरी प्याडका लागि एमालेले वार्षिक १५ सय रुपैयाँ अनुदान दिने घोषणा पनि गरेको छ।
किसानले गरेको उत्पादन सरकारले खरिद गर्ने, किसानलाई मल, बिउ र ऋणको व्यवस्था, उत्पादकत्व बढाउन उद्योगीलाई वित्तीय व्यवस्था, श्रमिकको तलब पाँच वर्षमा २५ हजार पुर्याउने, श्रमिकको उत्पादकत्व बढाउन सीप विकास गर्ने घोषणा एमालेले गरेको छ।
आगामी पाँच वर्षमा रणनीतिक सडक तथा निर्माणाधीन राष्ट्रिय गौरवका आयोजना सम्पन्न गर्ने, २ वर्षभित्र नेपाललाई पूर्ण साक्षर बनाउने घोषणा एमालेले गरेको छ।
