काठमाडौं- बर्खास्तीमा परेका नेपाल वायुसेवा निगमका कार्यकारी अध्यक्ष युवराज अधिकारीमाथि अख्तियार दुरुपयोग अनुसन्धान आयोगले छानबीन सुरु गरेको छ।

संस्कृति, पर्यटन तथा नागरिक उड्डयन सचिवको नेतृत्वमा बनेको छानबीन समितिले दिएको तथ्यप्रमाण तथा २०७६ सालमा अख्तियारमा परेको उजुरीको विषयलाई लिएर अख्तियारले अधिकारीमाथि छानबीन थालेको हो।

सचिवको नेतृत्वमा बनेको छानबीन समितिले निगमको जहाज एक निजी कम्पनीलाई भाडामा दिँदै आर्थिक हिनामिना गरेको, आफू निकट कर्मचारीलाई आर्थिक चलखेल गर्दै बढुवा तथा सरुवा गरेको विषयमा छानबीन गर्न आवश्यक रहेको भन्दै अख्तियारलाई सिफारिस गरेको थियो।

छानबीन समितिको सिफारिस र २०७६ सालमा अर्थ विभाग प्रमुख हुँदा गरेको आर्थिक अपचलनको विषयले बर्खास्तीमा परेका निगम कार्यकारी अध्यक्ष अधिकारीमाथि छानबीन सुरु भएको अख्तियार स्रोतको दाबी छ।

यता सरकारले बर्खास्त गरेपनि अधिकारी भने निगममा आइतबार हाजिर भएर आर्थिक स्वार्थ जोडिएको फाइलहरूमा तोक आदेश दिँदै   केही कर्मचारी लिएर उपत्यका बाहिर भ्रमणमा निस्किएका थिए।

यसअघि निगमलाई चरम आर्थिक संकटमा पुर्‍याउने गरी काम गरेको भन्दै अधिकारी विरुद्ध अख्तियारमा उजुरी परेको थियो। २०७६ साउन २८ गते अधिकारीमाथि छानबीनका लागि भन्दै उजुरी परेको थियो।

अख्तियारले पनि उजुरीउपर अहिले पनि छानबीन गरिरहेको छ। फेरि मन्त्रालयले छानबीनका लागि सिफारिस गरेको हो। अधिकारीकै विषय २०७६ कात्तिक ९ गते संस्कृति, पर्यटन तथा नागरिक उड्डयन सचिव स्तरीय निर्णय हुँदै अधिकारीमाथि छानबीन गर्न उपसचिवको नेतृत्वमा समिति गठन भएको थियो।

तत्कालीन समयमा समितिले अधिकारीको शैक्षिक प्रमाणपत्र, रकम भुक्तानीको विषय र एक महिला कर्मचारीलाई योग्यता नपुगेकै अवस्थामा अर्थ विभागमा जिम्मेवारी दिएको विषय छानबीन गर्दै अख्तियारलाई आवश्यक कारबाही गर्न सिफारिस भएको थियो।