काठमाडौं- नेपाल नागरिक उड्डयन प्राधिकरणले सुर्खेत भेरी गंगा रामघाट विमानस्थल आयोजनाको वातावरणीय प्रभाव मूल्यांकन प्रतिवेदन तयारीको लागि क्षेत्र निर्धारणसम्बन्धी सूचना जारी गरेको छ।
यो विमानस्थल आन्तरिक हवाई जहाज उडान तथा अवतरणका लागि निर्माण हुने प्राधिकरणले जनाएको छ। पूर्व पश्चिम फैलिने विमानस्थलको धावनमार्ग २७ सय ९० मिटर लामो तथा ४५ मिटर चौडा हुने प्राधिकरणले जनाएको छ।
धावनामार्गसँगैको एउटा ट्याक्सी वे मार्ग १२ सय ९६ मिटर लामो तथा ३० मिटर चौडा हुने प्राधिकरणले जनाएको छ। यसैगरी २ वटा लिंक ट्याक्स वे मार्ग १३७.५ मिटर लामो तथा ३० मिटर चौडा हुने छ।
विमानस्थलमा एप्रोन ७ सय मिटर लामो तथा १३० मिटर चौडा रहनेछ। २२४.४ हेक्टर क्षेत्रमा निर्माण हुने विमानस्थलमा टर्मिनल भवन, स्टाफ क्वाटर तथा पार्किङ लगायतको संरचना निर्माण हुने छ।
आयोजनको परामर्शदाता प्याक्ट कन्सल्टयान्ट रहेको छ। यो विमानस्थल निर्माणको काम थालनीकै लागि नेपाल नागरिक उड्डयान प्राधिकरणले चालु आर्थिक वर्ष २०७९/०८० को बजेटमार्फत ४ करोड ४ लाख ४७ हजार रुपैयाँ विनियोजन गरेको छ।
