काठमाडौं- नेपाल स्टक एक्सचेञ्ज (नेप्से) मा सूचीकृत बैंक तथा वित्तीय संस्थाले आर्थिक वर्ष २०८२/८३ को मुनाफाबाट सेयरधनीलाई लाभांश वितरण गर्ने घोषणा गर्न थालेका छन्। 

हालसम्म चार वाणिज्य बैंक, तीन विकास बैंक र नेपाल इन्फ्रास्ट्रक्चर बैंक (निफ्रा) सहित विभिन्न संस्थाले लाभांश प्रस्ताव गरेका हुन्।

घोषणा भएको लाभांशमध्ये गरिमा विकास बैंकले सबैभन्दा बढी २० प्रतिशत लाभांश दिने प्रस्ताव गरेको छ। बैंकले १० प्रतिशत बोनस सेयर र १० प्रतिशत नगद लाभांश वितरण गर्ने प्रस्ताव गरेको हो।

ग्लोबल आइएमई बैंकको १० प्रतिशत

ग्लोबल आइएमई बैंक लिमिटेडले आर्थिक वर्ष २०८२/८३ को मुनाफाबाट सेयरधनीलाई कुल १० प्रतिशत लाभांश वितरण गर्ने प्रस्ताव गरेको छ। भदौ १७ गते बसेको सञ्चालक समितिको बैठकले ४ प्रतिशत बोनस सेयर र कर प्रयोजनसहित ६ प्रतिशत नगद लाभांश दिने निर्णय गरेको हो।

प्रस्तावित लाभांश नेपाल राष्ट्र बैंकबाट स्वीकृति तथा बैंकको आगामी वार्षिक साधारण सभाबाट पारित भएपछि मात्र सेयरधनीलाई वितरण हुनेछ।

एभरेष्ट बैंकको १५ प्रतिशत

एभरेष्ट बैंक लिमिटेडले आर्थिक वर्ष २०८२/८३ को मुनाफाबाट कुल १५ प्रतिशत लाभांश वितरण गर्ने प्रस्ताव गरेको छ। बैंकले ५ प्रतिशत बोनस सेयर र १० प्रतिशत नगद लाभांश दिने भएको हो।

बैंकको हाल कायम १३ अर्ब ७२ करोड १३ लाख ७५ हजार ९२४ रुपैयाँ चुक्ता पुँजीका आधारमा उक्त लाभांश प्रस्ताव गरिएको हो।

लाभांश पारित गर्न बैंकले असोज १४ गते काठमाडौंको आम्रपाली ब्यांक्वेट, भाटभटेनीमा ३२औँ वार्षिक साधारण सभा बोलाएको छ। सभा बिहान १० बजे सुरु हुनेछ।

साधारण सभा तथा लाभांश वितरण प्रयोजनका लागि बैंकले असोज १ गते बुकक्लोज गर्ने जनाएको छ। यसअनुसार भदौ ३१ गतेसम्म कायम सेयरधनीले लाभांश प्राप्त गर्नुका साथै साधारण सभामा सहभागी हुन पाउनेछन्।

सानिमा बैंकको १० प्रतिशत नगद

सानिमा बैंक लिमिटेडले सेयरधनीलाई १० प्रतिशत नगद लाभांश वितरण गर्ने प्रस्ताव गरेको छ। बैंकको हाल कायम चुक्ता पुँजी १३ अर्ब ५८ करोड १५ लाख २५ हजार ४१४ रुपैयाँ रहेको छ।

साधारण सेयरधनीका लागि बैंकले १ अर्ब ३५ करोड ८१ लाख ५२ हजार ५४१ रुपैयाँ नगद लाभांश प्रस्ताव गरेको छ। यस्तै, अग्राधिकार सेयरधनीलाई करसहित ८.२५ प्रतिशत नगद लाभांश वितरण गर्ने प्रस्ताव गरिएको छ। त्यसका लागि ५ करोड २४ लाख ३८ हजार ३५६ रुपैयाँ छुट्याइएको छ।

दुवै वर्गका सेयरधनीलाई गरी बैंकले कुल १ अर्ब ४१ करोड ५ लाख ९० हजार ८९७ रुपैयाँ नगद लाभांश वितरण गर्ने प्रस्ताव गरेको छ।

बैंकले प्रस्तावित लाभांश पारित गर्न असोज १२ गते आम्रपाली ब्यांक्वेट, भाटभटेनीमा २२औँ वार्षिक साधारण सभा बोलाएको छ। सभा बिहान ११ बजे सुरु हुनेछ। लाभांश तथा साधारण सभा प्रयोजनका लागि असोज १ गते बुकक्लोज हुनेछ।

नबिल बैंकको १५.८० प्रतिशत

नबिल बैंक लिमिटेडले आर्थिक वर्ष २०८२/८३ को वितरणयोग्य मुनाफाबाट सेयरधनीलाई कुल १५.८० प्रतिशत लाभांश वितरण गर्ने प्रस्ताव गरेको छ।

बैंकको सञ्चालक समितिले साधारण सेयरतर्फ ५ प्रतिशत बोनस सेयर र १०.८० प्रतिशत नगद लाभांश वितरण गर्ने निर्णय गरेको हो। बोनस सेयरका लागि १ अर्ब ३५ करोड २८ लाख ४९ हजार ८३६ रुपैयाँ ४६ पैसा तथा नगद लाभांशका लागि २ अर्ब ९२ करोड २१ लाख ५५ हजार ६४६ रुपैयाँ ७६ पैसा छुट्याइएको छ। प्रस्तावित लाभांश नेपाल राष्ट्र बैंकको स्वीकृति र बैंकको आगामी साधारण सभाबाट पारित भएपछि वितरण हुनेछ।

गरिमा विकास बैंकको सबैभन्दा बढी २० प्रतिशत

गरिमा विकास बैंकले आर्थिक वर्ष २०८२/८३ को मुनाफाबाट सेयरधनीलाई कुल २० प्रतिशत लाभांश वितरण गर्ने प्रस्ताव गरेको छ। यो सूचीमा रहेको सबैभन्दा उच्च लाभांश हो।

भदौ १८ गते बसेको सञ्चालक समितिको बैठकले हाल कायम ६ अर्ब २ करोड १३ लाख ४८ हजार ३६७ रुपैयाँ चुक्ता पुँजीका आधारमा १० प्रतिशत बोनस सेयर र १० प्रतिशत नगद लाभांश वितरण गर्ने प्रस्ताव गरेको हो।

प्रस्तावित लाभांश नेपाल राष्ट्र बैंकबाट स्वीकृत भई बैंकको आगामी वार्षिक साधारण सभाबाट पारित भएपछि सेयरधनीलाई वितरण गरिनेछ।

सांग्रिला डेभलपमेन्ट बैंकको १०.५२ प्रतिशत

सांग्रिला डेभलपमेन्ट बैंकले आर्थिक वर्ष २०८२/८३ को मुनाफाबाट कुल १०.५२ प्रतिशत लाभांश वितरण गर्ने प्रस्ताव गरेको छ।

बैंकले ४ प्रतिशत बोनस सेयर र ६.५२६३ प्रतिशत नगद लाभांश दिने प्रस्ताव गरेको हो। बैंकको चुक्ता पुँजी ३ अर्ब ७३ करोड ४० लाख ६८ हजार ५०५ रुपैयाँ ५३ पैसा रहेको छ।

बोनस सेयरका लागि १४ करोड ९३ लाख ६२ हजार ७४० रुपैयाँ २२ पैसा र नगद लाभांशका लागि २४ करोड ३६ लाख ९७ हजार १०२ रुपैयाँ ४७ पैसा छुट्याइएको छ। बोनस र नगद गरी बैंकले कुल ३९ करोड ३० लाख ५९ हजार ८४२ रुपैयाँ ६९ पैसा लाभांश वितरण गर्ने प्रस्ताव गरेको छ।

कामना सेवा विकास बैंकको १५ प्रतिशत नगद

कामना सेवा विकास बैंक लिमिटेडले साधारण सेयरधनीलाई १५ प्रतिशत नगद लाभांश वितरण गर्ने प्रस्ताव गरेको छ।

यस्तै, अग्राधिकार सेयरधनीलाई सेयर बाँडफाँट भएको मितिदेखि आर्थिक वर्ष २०८२/८३ को असार मसान्तसम्मको अवधिका लागि अनुपातिक रूपमा ९ प्रतिशत लाभांश दिने प्रस्ताव गरिएको छ।

बैंकको कुल चुक्ता पुँजी ४ अर्ब २१ करोड १९ लाख ३० हजार ८१४ रुपैयाँ ९४ पैसा रहेको छ। साधारण सेयरतर्फ १५ प्रतिशतका दरले ५७ करोड ९२ लाख ९५ हजार ६२२ रुपैयाँ २४ पैसा नगद लाभांश वितरण गर्ने प्रस्ताव गरिएको छ। अग्राधिकार सेयरधनीका लागि १ करोड ४० लाख ६७ हजार ९२३ रुपैयाँ २९ पैसा छुट्याइएको छ।

बैंकले लाभांश पारित गर्न भदौ ३१ गते काठमाडौंको आम्रपाली ब्यांक्वेट, भाटभटेनीमा २०औँ वार्षिक साधारण सभा बोलाएको छ। सभा बिहान ११ बजे सुरु हुनेछ।

साधारण सभा तथा लाभांश वितरण प्रयोजनका लागि भदौ १८ गते बुकक्लोज गरिएको थियो। त्यसअनुसार भदौ १७ गतेसम्म कायम सेयरधनीले प्रस्तावित लाभांश प्राप्त गर्नेछन्।

निफ्राको ५.२६ प्रतिशत नगद

नेपाल इन्फ्रास्ट्रक्चर बैंक (निफ्रा) ले आर्थिक वर्ष २०८२/८३ को मुनाफाबाट सेयरधनीलाई ५.२६३२ प्रतिशत नगद लाभांश वितरण गर्ने प्रस्ताव गरेको छ।

भदौ १४ गते बसेको सञ्चालक समितिको बैठकले करसहित उक्त दरमा नगद लाभांश वितरण गर्ने निर्णय गरेको हो।

निफ्राको प्रस्तावित लाभांश नेपाल सरकार, अर्थ मन्त्रालय तथा नेपाल राष्ट्र बैंकबाट स्वीकृत हुनुपर्नेछ। त्यसपछि बैंकको आगामी वार्षिक साधारण सभाबाट प्रस्ताव पारित भएपछि मात्र सेयरधनीलाई लाभांश वितरण गरिनेछ।