.jpg)
.gif)
.gif)
काठमाडौं- काठमाडौं महानगरपालिकाले शुक्रराज ट्रपिकल तथा सरुवा रोग अस्पताल (टेकु) मा देखिएको रेबिजविरुद्धको खोपको अभाव टार्न सहयोगस्वरूप खोप उपलब्ध गराएको छ।
.gif)
महानगरपालिकाकी कार्यवाहक प्रमुख सुनिता डंगोलले एक औपचारिक कार्यक्रमबीच उक्त खोप अस्पताल प्रशासनलाई हस्तान्तरण गरिन्।
.gif)
.gif)
रेबिजको उपचारका लागि टेकु अस्पताल भरपर्दो र सुलभ गन्तव्य रहेकाले काठमाडौं महानगरसहित छिमेकी पालिका र देशभरबाट आउने बिरामीहरू प्रत्यक्ष प्रभावित हुने जोखिमलाई मध्यनजर गर्दै महानगरले खोप सहयोग गरेको हो।
खोप हस्तान्तरण कार्यक्रममा बोल्दै कार्यवाहक प्रमुख डंगोलले रेबिज प्राणघातक रोग भएको र जनावरको टोकाइपछि समयमै खोप नपाउँदा व्यक्तिको मृत्यु हुनु स्वास्थ्य प्रणालीकै लागि चुनौती भएको बताइन्।
महानगरपालिकाले स्वास्थ्य विभाग र अस्पताल प्रशासनको द्रुत समन्वयका कारण छोटो समयमै खोप व्यवस्थापन गर्न सम्भव भएको जनाएको छ।
यस सहकार्यले नागरिकको स्वास्थ्य सेवामा पहुँच सुनिश्चित गर्न र सम्भावित मानवीय क्षति रोक्न मद्दत पुग्ने अपेक्षा गरिएको छ। डंगोलले महानगरबाट उपलब्ध खोपले नियमित आपूर्ति नहुन्जेलसम्मका लागि संकट व्यवस्थापनमा महत्वपूर्ण भुमिका खेल्ने विश्वास व्यक्त गरिन्।
अस्पतालका निर्देशक डा. अनुप बास्तोलाका अनुसार पछिल्लो समय सरकारी खरिद प्रक्रियामा देखिएका केही प्राविधिक र प्रक्रियागत कठिनाइका कारण खोप आपूर्तिको व्यवस्थापन चुनौतीपूर्ण बनेको थियो। उक्त चुनौतीका बीच पनि अस्पतालले गण्डकी र बागमती प्रदेश लगायत अन्य विभिन्न निकायहरूसँगको समन्वयमा खोप सेवालाई निरन्तरता दिँदै आएको बताए।
महानगरपालिकाले उपलब्ध गराएको १८ सय भायल खोपले थप ९ देखि १० दिनसम्मको माग धान्ने अस्पतालले जनाएको छ। अस्पतालमा दैनिक करिब दुई सयको हाराहारीमा सेवाग्राही खोप लगाउन आउने गरेका छन्।
