.jpg)
.gif)
.gif)
भरतपुर- राष्ट्रिय स्वतन्त्र पार्टी (रास्वपा) का प्रवक्ता मनिष झाले पार्टीको प्रथम महाधिवेशनका लागि उद्योगी व्यापारीमार्फत चन्दा संकलन नगरेको स्पष्ट पारेका छन्।
.gif)
महाधिवेशन स्थलमा आज सञ्चारकर्मीसँग कुरा गर्दै प्रवक्ता झाले महाधिवेशनका नाममा व्यापारी र घरना समूहलाई रसिद पठाउने अभ्यास अन्त्य गरिएको बताए।
.gif)
.gif)
'हामीले आफ्नो व्यवस्था आफैँ गरेका छौँ,' उनले भने, 'महाधिवेशनका लागि नै भनेर कुनै घराना व्यापारीलाई रसिद पठाएका छैनौँ।' महाधिवशेन सञ्चालनका लागि चार करोड रूपैयाँ लाग्ने अनुमान रास्वपाले गरेको छ। सो रकम सांसद, केन्द्रीय समिति, विभिन्न विभागका सदस्यबाट उठ्ने लेबी तथा महाधिवेशन प्रतिनिधिबाट उठ्ने उनले बताए।
'हामी सांसदले प्रतिमहिना १६ हजार ५०० रुपैयाँ उठाउँछौँ। त्यहाँबाट महिनामा ३२ लाख रुपैयाँ संकलन हुन्छ। केन्द्रीय सदस्यले वार्षिक २५ हजार रुपैयाँ संकलन गर्दछौँ,' उनले भने, 'महाधिवेशन प्रतिनिधिबाट नै डेढ करोड रुपैयाँ संकलन हुन्छ।' उनले शुभेच्छुकहरूलाई आन्तरिक रूपमा ‘क्युआर’ पठाइएको बताए।
रास्वपामा लागेका अधिकांश व्यक्तिको आन्तरिक पेसा भएकाले चन्दा नै उठान नपरेको उनको भनाइ छ। रास्वपाका नेता तथा कार्यकर्ता यातायात र आवासको व्यवस्था आफैँ गर्न सक्ने अवस्थामा रहेको प्रवक्ता झाले बताए। 'हामीले महाधिवेशनमा आउने टिकटको व्यवस्था आफैँ गरेका छौँ। होटल बुक पनि आफैँ नै गर्ने हो,' उनले भने, 'राजनीतिमा आउने व्यक्तिको वैकल्पिक पेसा हुनुपर्छ। कसैलाई चन्दा माग्ने हो भने उसले लाभ लिन खोज्छ।'
व्यापारिक घरानामा रसिद पठाउने अभ्यास बन्द गर्नुपर्ने उनले बताए। 'निर्वाचनका बेला पनि रास्वपाले पैसा माग्ने काम गरेन। जनताका लागि काम गर्न आयौँ भन्छौँ, तर जनता व्यापारीसँग उल्टै पैसा लिन थाल्छौँ। त्यो त राजनीति नै भएन नि!' उनले भने, 'हामीले सहयोग माग्छौँ त्यो मान्छेको स्वार्थ हुन्छ।' रास्वपाको प्रथम महाधिवेशन यही असार ७ देखि ९ गतेसम्म चितवनको भरतपुरमा हुँदैछ। रासस
