चितवन- चितवन राष्ट्रिय निकुञ्जले एक वर्षमा एक करोड ८२ लाख ६१ हजार ७७० रूपैयाँ राहत प्रदान गरेको छ। निकुञ्ज र मध्यवर्ती क्षेत्र आसपास बसोबास गर्ने जनतालाई सो राहत रकम वितरण गरिएको हो। ७२२ घटनामा सोबराबरको राहत रकम प्रदान गरिएको हो।

जंगली जनावरले गरेका विभिन्न क्षतिको स्थानीयलाई राहत प्रदान गर्ने गरिएको हो। वन्यजन्तुबाट सामान्य घाइते भएका नौ जनालाई ९३ हजार ८५२, गम्भीर घाइते भएका ३२ जनालाई २९ लाख ७४ हजार ६८१ रूपैयाँ क्षतिपूर्तिबापत रकम वितरण गरिएको छ।

निकुञ्जका सूचना अधिकारी अविनाश थापा मगरका अनुसार गत आर्थिक वर्षमा जंगली जनावारको आक्रमणका कारण १० जनाको मृत्यु भएको थियो। उनीहरुको परिवारलाई राहतस्वरुप १० लाख रूपैयाँका दरले प्रदान गरिएको उनले जानकारी दिए।

यस्तै, १७२ पशुधनको क्षति भएको छ। सो बापत निकुञ्जले १७ लाख चार हजार ७०० रूपैयाँ राहत रकम स्थानीयलाई उपलब्ध गराएको छ। निकुञ्जबाट बस्ती पसेर विभिन्न जनावरले क्षति पुर्‍याउँदै आएका छन्। यसै क्रममा भण्डारण गरेको अन्नमा १३ पटक क्षति पुर्‍याएको छ। सोबापत ८३ हजार रूपैयाँ, २३ वटा घरगोठको क्षति पुर्‍याएकामा दुई लाख १८ हजार रूपैयाँ राहत रकम प्रदान गरिएको छ।

सूचना अधिकारी मगरका अनुसार अन्नबाली ४५३ पटक क्षति पुर्‍याएबापत ३१ लाख ६० हजार १०० रूपैयाँ राहत रकम बुझाइएको छ। सातवटा कुखुराको क्षति भएबापत २७ हजार ५०० रूपैयाँ राहत रकम निकुञ्जले आसपासमा बसोबास गर्ने मध्यवर्तीका बासिन्दालाई बुझाएको छ।

निकुञ्जमा रहेका जंगली हात्ती, गैँडा, बाघ, भालु, जंगली बँदेल, मगरगोहीलगायतले क्षति पुर्‍याउँदै आएका छन्। रासस