चितवन- अण्डाको मूल्य हालसम्मको उच्च भएको छ। उत्पादन घटेपछि मूल्य बढेको हो। यससँगै किसानले अण्डाको लागत मूल्य पाएका छन्।

नेपाल लेयर्स कुखुरापालक संघले विभिन्न फार्महरूले सार्वजनिक गरेको दररेटलाई आधार मानी समर्थन मूल्य तोकेको छ। आजबाट लागु हुने गरी ठूलो अण्डाको किसानको दररेट प्रतिक्रेट (३० वटाको) पाँचसय २५ रूपैयाँ कायम गरिएको छ। मध्यम चारसय ९५ रूपैयाँ कायम भएको छ।

चितवनलाई आधार मानी दररेट तय गरिएको हो। यहाँबाट देशका विभिन्न क्षेत्रमा अण्डा पुग्दा बजारको दररेट नयाँ कायम हुन्छ। संघका अध्यक्ष विनोद पोखरेलका अनुसार बिक्री मूल्य प्रतिपेटी (सात क्रेट)को तीन हजार ८५५ र मिडियमको तीन हजार ६४५ रूपैयाँ कायम गरिएको छ।

अध्यक्ष पोखरेलका अनुसार यसअघि गत वर्षको भदौमा ठूलो अण्डाको मूल्य प्रतिक्रेट पाँचसय १० रूपैयाँ पुगेको थियो। उनले भने, 'हालसम्मकै उच्च रेट अण्डाको कायम भएको छ।'

यससँगै किसानले लागत मूल्य पाएको उनले बताए। अण्डाको लागत मूल्य प्रतिगोटा १६ रूपैयाँ ५६ पैसा रहेको छ। अण्डा उत्पादनमा संलग्न कुखुराको सङ्ख्या घटेर मागअनुसार आपूर्ति हुन नसक्दा मूल्य बढेको जनाइएको छ।

साथै बुढा कुखुरा बिक्री भइ किसान विस्थापित हुँदा नयाँ चल्ला हाल्न नसकिएकाले पनि उत्पादनमा असर परेको उनले बताए। उनले भने, 'अहिलेको अवस्थालाई हेर्दा अण्डाको मूल्य क्रमशः बढ्ने देखिन्छ।'

मूल्य बढ्दा किसान उत्साहित भएका छन्। यकिन तथ्यांक नभए पनि हाल दैनिक २८-३० लाख गोटा अण्डा उत्पादन भइरहेको अनुमान छ। यो सङ्ख्या पहिलाको तुलनामा झन्डै आधा कम हो। रासस