काठमाडौं- कृषि तथा पशुपन्छी विकास मन्त्रालयले हाल मुलुकका केही स्थानका पशु चौपायहरुमा लम्पी स्किन र अफ्रिकन स्वाईन फ्लु देखापरेको भन्ने सञ्चार माध्यममा आएको समाचार प्रति ध्यानाकर्षण भएको जनाएकाे छ।

साथै रोगको वस्तुगत अवस्थिती अध्ययन गरी तत्काल नियन्त्रणका लागि प्रभावकारी उपाय पहिचान गर्न मातहतका निकायहरुलाई परिचालन गरीएको मन्त्रालयकाे भनाइ छ।

कृषि तथा पशुपन्छी विकासमन्त्री रामनाथ अधिकारीको अध्यक्षतामा साेमबार बसेको सम्बन्धित अधिकारीहरुको बैठकले पशु सेवा विभाग अन्तरगतका वरिष्ठ पशु चिकित्सकको नेतृत्वमा पशुपन्छी रोग अन्वेषण प्रयोगशाला, प्रदेश मन्त्रालय अन्तरगतका सम्बन्धि अधिकृत र स्थानीय तह समेतको सहभागितामा टोली गठन गरी तत्काल रोग देखा परेका क्षेत्रमा परिचालन गर्ने निर्णय गरेकाे छ।

रोगको वस्तुस्थितीको दैनिक र आवधिक रिपोटिङ पशु सेवा विभागले मन्त्रालयका पशु स्वास्थ्य महाशाखाका वरिष्ठ पशु चिकित्सक डा. तपेन्द्र प्रसाद बाेहोरालाई गराउने गरी फोकल पोइन्ट तोकिएको पनि मन्त्रीकाे सचिवालयले जनाएकाे छ।

बैठकले वर्षायामको सुरुवात हुने क्रमसँगै देखा पर्न सक्ने लामखुट्टे लगायतका किराहरुबाट सर्ने पशु रागहरुको जोखिमलाई आँकलन गरी रोग नियन्त्रण लागि आवश्यक पर्ने खोपसहितका आवश्यक वस्तु र परिश्रमि समेतको लागत तयार गरी रोग नियन्त्रण कार्य तिनवटै तहका सरकारको सहभागीतामा हुने गरी परिचालनका लागि स्रोत व्यवस्थापन समेतको आँकलन गर्न पशु सेवा विभागलाई निर्देशन दिएको छ।