खोटाङ- यहाँको हलेसी तुवाचुङ नगरपालिकाले महिला, अपा‌ंगता भएका र वैदेशिक रोजगारीबाट फर्किएकालाई बंगुरको पाठापाठी उपलब्ध गराएको छ। उनीहरुको आम्दानीको स्रोत वृद्धि गराउँदै नगरपालिकालाई मासुमा आत्मनिर्भर बनाउने उद्देश्यले उन्नत जातका बंगुरको पाठापाठी उपलब्ध गराएको नगरपालिकाले जनाएको छ।

नगरपालिकाले पारित गरेको ‘बंगुर प्रबर्द्धन कार्यक्रम’ अन्तर्गत यस वर्ष ११५ वटा उन्नत जातका बंगुरको पाठापाठी वितरण गरिएको नगर प्रवक्ता कमल गिरीले जानकारी दिए। ‘नगरवासीलाई बंगुरपालन व्यवसाय गराउन १६ घरपरिवारलाई खोर निर्माण गर्न ६० प्रतिशत अनुदान उपलब्ध गराएका छौँ। दुई लाख बराबरको खोर बनाएका घरपरिवारलाई नगरपालिकाका तर्फबाट एक लाख २० हजार अनुदान दिइएको छ’ उनले  भने।

साथै अनुदानमा खोर बनाएका घरपरिवारलाई नगरपालिकाले दुईवटाको दरले बंगुरको पाठापाठी उपलब्ध गराएका छ। पशु प्राविधिकमार्फत परामर्श तथा औषधि उपचारसमेत उपलब्ध गराउने गरिएको छ।नगरपालिकाबाट गठित छनोट समितिको सिफारिसमा ६८ घरपरिवारलाई एक/एक वटा बंगुरको पाठा उपलब्ध गराइएको नगर प्रवक्ता गिरीले जानकारी दिए।

करुणा फाउनडेसनको सहयोगमा १५ वटा उन्नत जातका बंगुरको पाठापाठी अपा‌ंगता भएका घरपरिवारलाई उपलब्ध गराइएको हो। नगरसभाबाट १२ लाख ५० हजार रुपैयाँ बजेट विनियोजन गरी बंगुर प्रबर्द्धन कार्यक्रम सञ्चालन गर्न आवेदन आह्वान गरेको थियो। नगरपालिकाले कृषि, पशु तथा उद्यम गर्न चाहनेलाई अनुदान उपलब्ध गराउँदै आएको छ।

नगरपालिकाले यसअघि उन्नत जातका १०० वटा भैँसी वितरण गरिसकेको छ। सुक्खाग्रस्त क्षेत्रमा पर्ने यस नगरपालिकाले नगरबासीलाई दूध, मासु र तरकारीमा आत्मनिर्भर बनाउन आर्थिक वर्ष २०८०/८१ को नगरसभाबाट नीति तथा कार्यक्रम पारित गरेको थियो।

विशेषगरी वैदेशिक रोजगारीमा जाने युवालाई आफ्नै ठाउँमा रोजगार बनाउन व्यावसायिक कृषि तथा पशुपालनमा अनुदान दिने व्यवस्था गरेको नगरप्रमुख विमला राईले बताइन्। उनी भन्छिन, ‘हाम्रो नगरपालिकालाई दूध, मासु र तरकारीमा आत्मनिर्भर बनाउने योजना छ।’ रासस