नेपालगञ्ज- भूमि समस्या समाधान आयोगले बाँकेमा पहिलो चरणमा करिब सातसय जग्गाधनी पुर्जा वितरण गर्न लागेको छ।

भूमि समस्या समाधान आयोग बाँकेका अध्यक्ष घननाथ खनालले त्यसका लागि हालसम्म करिब पाँचसय ६३ लालपुर्जाको प्रमाणीकरण भएको जानकारी दिए। तीमध्ये एकसय १२ जनाको सनाखत प्रक्रिया पूरा भएको र अन्यको लालपुर्जाको आवश्यक प्रक्रिया चलिरहेको उनले बताए।

जिल्लाको कोहलपुर नगरपालिका-१ स्थित कौशिल्यानगरबाट यही २० गते लालपुर्जा वितरण प्रारम्भ हुने आयोगले जनाएको छ। भूमिहीन दलित र सुकम्बासीलाई जग्गाधनी लालपुर्जा वितरण गर्न लागिएको तर धेरैजसो मान्छे घरमा नभएकाले केही कठिनाइ भइरहेको अध्यक्ष खनालको भनाइ छ।

'लगत्तै अव्यस्थित बसोबासी भएकालाई पनि जग्गाको लालपुर्जा वितरण हुनेछ। २० गतेबाट वितरण हुने लालपुर्जाको प्रमाणीकरणको काम शनिबारसम्म सक्नुपर्ने बाध्यता रहेको छ। बाँकेका आठ स्थानीय तहमध्ये डुडुवा गाउँपालिकाबाहेक सबै स्थानीय तहमा लालपुर्जा वितरणका लागि काम भइरहेको छ। कोहलपुर नगरपालिका, नेपालगञ्ज उपमहानगरपालिकाका केही वडामा लगत संकलन, जानकी र नरैनापुरमा जग्गाको नापी कार्य जारी छ। जिल्लाका डुडुवाबाहेक सबै स्थानीय तहका सबै वाडामा नापी हुँदैछ', उनले भने।

विगतका आयोगबाट भएका अधुरा र अपूरा कार्यको अभिलेख सम्बन्धमा नापी कार्यालय कोहलपुर, बाँके, मालपोत कार्यालय कोहलपुर र नेपालगञ्जलाई पत्रचार गरेर क्रमशः सबैतिर जग्गाधनी लालपुर्जा वितरणको तयारी भइरहेको आयोगले जनाएको छ। केही दिनअघि नेपालगञ्जमा बसेको सर्वदलीय बैठकले यही बैशाख २० गते भूमिहीन दलित र भूमिहीन सुकुम्बासी लालपुर्जा वितरण गर्ने निर्णय गरेको थियो।

हालसम्म बाँकेमा ५४ हजार हाराहारीमा जग्गाको लालपुर्जाका लागि आवेदन परेका छन्। आगामी असारभित्र ६ हजार लालपुर्जा वितरण गर्ने आयोगको लक्ष्य छ। रासस