काठमाडौं- पाथीभरा क्षेत्रमा केबलकार निर्माणका क्रममा अराजकता बढेपछि स्थानीय प्रशासनले निषेधाज्ञा जारी गरेको छ।

केबलकार बिरोधका नाममा आन्दोलन अराजकता बढेपछि आज बिहान ५ बजेबाट लागु हुनेगरी जिल्ला सुरक्षा समितिको बैठकले फुङलिङको बजार क्षेत्र र काफ्लेपाटीको बल्लुडाँडा क्षेत्रमा अनिश्चितकालीन निषेधाज्ञा जारी गरेको हो।

नो केबलकार पक्षको पदयात्राका क्रममा शनिबार साँझ फुङलिङ बजारको वीरेन्द्र चोकमा प्रहरीसँग झडप भएको थियो। यता एस केबलकार पक्षले पनि विरोध जुलुस निकाल्ने तयारी गरेपछि निषेधाज्ञा जारी गरेको हो।

जिल्ला प्रशासनका अनुसार प्रदर्शन र जुलुसका कारण स्थानीय स्तरमा प्रतिकूल स्थिति सिर्जना भइ शान्ति सुरक्षा भंग हुन सक्ने परिस्थिति देखिएपछि शनिबार राति बसेको जिल्ला सुरक्षा समितिको बैठकले निषेधाज्ञा जारी  गरेको हो।

प्रशासनले निषेधाज्ञा जारी भएको क्षेत्रमा पाँचजनाभन्दा बढी व्यक्ति भेला भएर सभा, जुलुस, प्रदर्शन गर्न पनि रोक लगाएको छ।