इलाम- जिल्लाको माङ्सेबुङ गाउँपालिकामा एकैपटक चार सिँचाइ आयोजना सुरु भएका छन्। चालु आर्षिक वर्षमा सम्पन्न हुनेगरी दुई करोड ८० लाख सात हजार ६ सय ७८ रूपैयाँको लागतमा उक्त सिँचाइ आयोजना सुरु भएका हुन्।

सो गाउँपालिकामा सञ्चालित साना सिँचाइ कार्यक्रमअन्तर्गत वडा नं १ मा दुई, वडा नं ३ मा एक र वडा नं ४ मा एक सिँचाइ आयोजना सुरु भएको गाउँपालिकाका इञ्जिनियर (अधिकृत छैटौँ) युवराज दाहालले जानकारी दिए।

वडा नं १ स्थित नाङरुङ टोलमा ७५ लाख ५९ हजार नौ सय ५६ रूपैयाँको लागतमा लम्फेवाखोला नाङरुङ कृषि कोलो सिँचाइ योजना र सोही वडाको साङरेम टोलमा ८० लाख रूपैयाँको लागतमा साङरेम सिँचाइ योजना सुरु भएको छ।

वडा नं ३ को सिङलाबु टोलमा ३८ लाख २७ हजार नौसय ७२ रूपैयाँको लागतमा खोँगीखोला सिङलाबु सिँचाइ योजना सुरु भएको छ। त्यस्तै वडा नं ४ को सिङफेरे र मार्चेबुङ टोलमा ८६ लाख १९ हजार सातसय ५० रूपैयाँको लागतमा रतुवाखोला बधमारा सिङफेरे मार्चेबुङ सिँचाइ योजना सुरु भएको हो।

आयोजना सञ्चालनका लागि स्वीस सरकारको ३० प्रतिशत अर्थात् ८४ लाख दुई हजार तीनसय तीन रूपैयाँ तथा संघीय सरकार, प्रदेश सरकार र गाउँपालिकाको २०/२० प्रतिशत अर्थात् ५६ लाख एक हजार तीनसय ३५ रूपैयाँका दरले र स्थानीय उपभोक्ताको १० प्रतिशत अर्थात् २८ लाख सातसय ६७ रूपैयाँ लागत साझेदारी रहेको छ। 

त्यसैगरी यस वर्ष तीन सिँचाइ योजना मर्मतसम्भारको काम सुरु भएको छ। सोही कार्यक्रमअन्तर्गत वडा नं १ स्थित बयरबोटे टोलमा चार लाख ७९ हजार रूपैयाँको लागतमा बरबोटे सिँचाइ योजना, सोही वडाको तीनघरे टोलमा चार लाख १९ हजार चारसय रूपैयाँको लागतमा तीनघरे सिँचाइ योजना र वडा नं ३ को चतुवा बेँसी टोलमा १२ लाख १० हजार दुईसय रूपैयाँको लागतमा रतुवा चिण्डे ठूलो बेँसी सिँचाइ योजना मर्मतसम्भारको काम भइरहेको गाउँपालिका अध्यक्ष हेमन्त राईले जानकारी दिए।

यसअघि नै निर्माण भएर प्राकृतिक प्रकोपका कारण क्षति भएका योजनाको मर्मतसम्भारको काम सुरु गरिएको उनले बताए। मर्मतसम्भारमा नयाँ निर्माण झैँ साझेदारी गरिएको उनले जानकारी दिए। गत वर्ष गाउँपालिकामा तीन करोड २६ लाख ५३ हजार तीनसय ४९ रूपैयाँको लागतमा ६ वटा सिँचाइ कुलो निर्माण सम्पन्न भइसकेका छन्। सो योजनाबाट ६६ दशमलव २३ हेक्टर क्षेत्रमा सिँचाइ सुविधा विस्तार भएको छ। 

सिँचाइ सुविधा पुगेपछि अन्नबाली, नगदेबाली तथा तरकारी बाली उत्पादन र उत्पादकत्वमा वृद्धि हुने अपेक्षा रहेको खोँगीका उपभोक्ता अनिस सुनुवारले बताए।

कृषि ज्ञान केन्द्र इलामको तथ्यांकअनुसार यस वर्ष १० हजार तीनसय ४२ हेक्टर क्षेत्रफलमा धानखेती गरिएकामा ३५ हजार ३९ मेट्रिकटन धान उत्पादन भएको छ। यस्तै १४ हजार आठसय १० हेक्टर क्षेत्रमा मात्र धानखेती लगाइएको थियो। इलाममा रञ्जित, राधा ४, चुल्ठे र अन्य स्थानीय जातका धानखेती गरिन्छ।

युवालाई स्वदेशमै रोजगारी उपलब्ध गराउन कृषि क्षेत्रमा आकर्षित गरी कृषिको उत्पादन र उत्पादकत्व वृद्धि गर्ने तथा कृषि क्षेत्रको व्यावसायीकरणबाट आयआर्जन बढाउने उद्देश्यले स्वीस सरकारको सहयोगमा साना सिँचाइ कार्यक्रम सञ्चालन भइरहेको छ। रासस