काठमाडौं- जिल्ला अदालत काठमाडौंले राष्ट्रिय स्वतन्त्र पार्टी (रास्वपा) का सभापति रवि लामिछानेलाई सहकारी ठगी प्रकरणमा ६० लाख रूपैयाँ धरौटीमा रिहा गर्न आदेश दिएको छ। न्यायाधीश माधवप्रसाद अधिकारीको इजलासले उक्त आदेश गरेको हो।
गोरखा मिडिया नेटवर्कमा कानूनविपरीत स्वर्णलक्ष्मी बहुउद्देश्यीय सहकारी संस्थाबाट पाँच करोड ७८ लाख ९८ हजार चारसय ८० लगेको प्रहरीको अनुसन्धानमा उल्लेख थियो। सभापति लामिछानेविरुद्ध पाँच करोड ७८ लाख ९८ हजार चारसय ८० रूपैयाँ बिगो माग दाबी गरिएको थियो।
सभापति लामिछानेको तर्फबाट वरिष्ठ अधिवक्ता सुशील पन्त र रमण श्रेष्ठले बहस गरेका थिए। बचतकर्ता (जाहेरवाला) को तर्फबाट जिल्ला सरकारी वकिल कार्यालयका प्रमुख रामहरि शर्मा काफ्ले, जिल्ला न्यायाधिवक्ता खडिन्द्रराज कटुवाल र सहायक न्यायाधिवक्ता गणेशकुमार शर्माले जवाफी बहस गरेका थिए।
.jpg)
पीडितकोतर्फबाट वरिष्ठ अधिवक्ता डा सुरेन्द्र भण्डारी र डा दिनेश त्रिपाठी बहस गरेका थिए। रासस
