काठमाडौं- भारत सरकारले नेपाललाई २ लाख टन गहुँ दिने भएको छ। गहुँ निर्यातमा प्रतिबन्ध लगाएको भारतले नेपाल सरकारको अनुरोधमा २ लाख टन निर्यात गर्न अनुमति दिने भएको हो।

भारतका लागि नेपाली राजदूत डा. शंकर शर्माले भारत सरकारले निर्यातको संस्थागत व्यवस्थासहित अनुमति दिएको उल्लेख गरेका छन्। 

भारत सरकारले नेशनल कोअपरेटिभ एक्सपोर्ट लिमिटेडको माध्यमबाट नेपालले यो गहुँ प्राप्त गर्ने छ। 

नेपाल सरकारले पाएको यो कोटाको गहुँ आयातका लागि नेपालका व्यवसायीलाई सरकारले छनौट गर्नेछ। छनौट भएका व्यवसायीले तोकिएको संस्थाबाट गहुँ आयात गर्न पाउने छन्। 

आफ्नो उत्पादन अपुग हुने भएकाले नेपाल गहुँमा भारतसँग निर्भर हुँदै आएको छ। यद्यपि पछिल्लो समय भारतले गहुँको निर्यातमा प्रतिबन्ध लगाएपछि सरकारी तहबाट सीमित कोटा पाउँदै आएको छ।