काठमाडौं- कामना सेवा विकास बैंकको नाफा २६ प्रतिशतले घटेको छ। कामना सेवा  विकास बैंककले आर्थिक वर्ष २०७९/८० मा ४३ करोड ११ लाख नाफा कमाएको छ जुन गत वर्षको भन्दा २६ प्रतिशतले न्यून हो। 

अघिल्लो आर्थिक वर्ष ५९ करोड रुपैयाँ खुद नाफा कमाएको बैंकले गत आर्थिक वर्षको सोही अवधिसम्ममा ४३ करोड ११ लाख रुपैयाँ खुद नाफा कमाएको छ।

खुद ब्याज आम्दानी बढेपनि इम्पेरमेन्ट चार्ज, सञ्चालन खर्च तथा गैरसञ्चालन खर्च बढेपछि बैंकको नाफा घट्न पुगेको हो।

समीक्षा अवधिमा बैंकको खुद ब्याज आम्दानी ८.६५ प्रतिशत बढेको छ भने खुद शुल्क तथा कमिशन आम्दानी १२.९२ प्रतिशत घटेको छ। त्यसैगरी, बैंकको कुल सञ्चालन आम्दानी ४.५५ प्रतिशत र सञ्चालन नाफा २०.०५ प्रतिशत घटेको छ। समीक्षा अवधिमा बैंकको निष्क्रिय कर्जा २.३१ प्रतिशतबाट २.९८ प्रतिशत पुगेसँगै इम्पेरमेन्ट चार्ज ५० करोड रुपैयाँ पुगेको छ। सो अवधिसम्ममा बैंकको वितरण योग्य नाफा ५ करोड ८० लाख रुपैयाँ रहेको छ भने वितरणयोग्य प्रतिसेयर आम्दानी १ रुपैयाँ ७७ पैसा रहेको छ।

नाफासँगै बैंकको प्रतिसेयर आम्दानी पनि घटेको छ। समीक्षा अवधिमा बैंकको यस्तो आम्दानी ५ रुपैयाँ ६४ पैसा घटेर १३ रुपैयाँ १४ पैसा पुगेको छ। असार मसान्तसम्ममा बैंकको मूल्य आम्दानी अनुपात २४.८८ गुणा रहेको छ भने प्रतिसेयर नेटवर्थ १४६ रुपैयाँ ४६ पैसा रहेको छ।

३ अर्ब २८ करोड ११ लाख रुपैयाँ चुक्ता पूँजी रहेको यस बैंकको जगेडा कोषमा १ अर्ब ५२ करोड ४३ लाख रुपैयाँ सञ्चित छ। समीक्षा अवधिमा बैंकको निक्षेप १५.६० प्रतिशत बढेको छ भने कर्जा लगानी ३.६६ प्रतिशत बढेको छ।