काठमाडौं- नेपाल उद्योग वाणिज्य महासंघको सदस्य नेपाल निर्माण व्यवसायी महासंघद्वारा विभिन्न माग राखि भइरहेको आन्दोलनप्रति महासंघको ध्यानाकर्षण भएको जनाएको छ।  

कुल गार्हस्थ उत्पादनमा ठूलो योगदान रहेको यस क्षेत्रका जायज माग सुनुवाइमा भइरहेको ढिलाईले निर्माण मात्र नभइ अर्थतन्त्रमा नै समस्या पर्ने देखिएको उद्योग वाणिज्य महासंघको भनाइ छ।  

व्यवसायीले निर्माण कार्य सम्पन्न गरेपनि भुक्तानी नहुँदा वित्तीय प्रणाली र समग्र अर्थतन्त्रमा नै नकारात्मक प्रभाव परेको हुँदा त्यसतर्पm सरकार सम्वेदनशील हुनु जरुरी रहेको महासंघले उल्लेख गरेको छ।  

‘विकास निर्माण र सर्वसाधारणको जीवनयापनसँग समेत जोडिएका परियोजना रोकिदा सरकारको पुँजीगत खर्च हुन सकेको छैन भने जनताले पनि सुविधा पाउन सकेका छैनन्’ महासंघद्वारा जारी विज्ञप्तिमा भनिएको छ, ‘गत वर्ष पुँजीगत खर्च जम्मा ६१ प्रतिशत भएको छ। यसले राष्ट्रिय अन्तर्राष्ट्रियस्तरमा पनि सकारात्मक सन्देश गएको छैन।’ 

निर्माण, उद्योग र थोक व्यापार नकारात्मक रहदा अर्थतन्त्र मन्दीमा गएको छ भने यसबाट बैंक वित्तीय संस्था, सिमेन्ट, छडजस्ता निर्माण सामाग्री उत्पादक र सरकारको राजस्वमा पनि गम्भीर असर परेको महासंघको भनाइ छ।

राजस्व १३ प्रतिशतले घटेको छ भने उद्योगहरू करिब ३० देखि ३५ प्रतिशत क्षमतामा चलिरहेका महासंघले जनाएको छ। 

अतः विभिन्न माग राखी आन्दोलित निर्माण व्यवसायीका जायज माग सम्बोधन गर्न नेपाल उद्योग वाणिज्य महासंघ नेपाल सरकार समक्ष आग्रह गरेको छ।