काठमाडौं- नक्बली बिजक प्रयोग गरी कर छली गरेको भन्दै आन्तरिक राजस्व विभागले करिब २ हजार करदातामाथि थप अनुसन्धानको प्रक्रिया अघि बढाएको छ। 

विभागले विगतदेखिकै अनुसन्धान तथा अहिलेको प्रणालीको एसिसमेन्टमा देखिएका कमजोरीको मूल्यांकन गरेर सम्बन्धित आन्तरिक राजस्व कार्यालयहरूलाई थप अनुसन्धानका लागि प्रमाणसहित निर्देशन दिइसकेको छ। 

गएको आर्थिक वर्षमा विभागले गरेको मिहिन अनुसन्धान तथा विगतका प्रमाणका आधारमा यस्तो प्रमाण जुटाएको हो। करदाताहरूले नक्कली बिजक प्रयोग गरि भ्याट, आयकर तथा अन्य कर छली गरेको विभागको प्रारम्भिक ठहर छ। 

१ हजार ९८६ जना करदाताले ९ अर्ब ९३ करोड रुपैयाँको कारोबार नक्कली बिजकबाट गरेको सुरुवाति अनुसन्धानबाट देखिएको छ। 

कार्यालयहरूले गर्ने थप अनुसन्धानबाट करका बारेमा ठोस निर्णय हुने विभागले जानकारी दिएको छ।