बेनी- बचतकर्ताको उजुरीपछि प्रहरीले शिवशिखर बहुउद्देश्यीय सहकारीविरुद्धको अनुसन्धान अघि बढाएको छ।

बेनीस्थित न्यूरोडमा आफ्नै भवनमार्फत सेवा केन्द्र विस्तार गरी बचत संकलन र लगानी दिँदै आएको सहकारी विगत पाँच महिनादेखि बन्द छ। सहकारीका कर्मचारी र व्यवस्थापक चार महिनायता सम्पर्कविहीन भएपछि बचतकर्ताले प्रहरीमा उजुरी दिएका थिए।

सहकारी विभागको अनुसन्धानसम्बन्धी सिफारिस र केन्द्रीय अनुसन्धान ब्यूरोबाट परिपत्र भएपछि अनुसन्धान अघि बढाइएको जिल्ला प्रहरी कार्यालयका सूचना अधिकारी प्रहरी निरीक्षक किरण लामाले जानकारी दिए।

उनका अनुसार अन्य बचतकर्ताले पनि जाहेरी दिने क्रम बढेको छ। मध्यपुर ठिमी नगरपालिका-३ कौशलटार भक्तपुरमा दर्ता भएको शिवशिखर बहुउदेश्यीय सहकारीले बेनीमा सदस्य सेवा केन्द्र विस्तार गरेको थियो।

सुरुवातमा बचतकर्तालाई आकर्षक ब्याजदरको लोभमा करोडौँ बचत संकलन गरेको सहकारीले पाँच महिनाअघि आर्थिक संकटमा रहेको सूचना प्रकाशित गरी कारोबार बन्द गरेको थियो।

सहकारीले एक वर्षअघि न्यूरोडमा करिब छ करोडमा सात आना जग्गासहित घर खरिद गरेर शाखा सञ्चालन गर्दै आएको थियो। सहकारीले बचत फिर्ता नगरेको भन्दै बेनी नगरपालिकाको न्यायिक समितिमा समेत उजुरी परेको छ। रासस