काठमाडौं- गतसाताको अविरल वर्षाका कारण देशका विभिन्न राजमार्गहरु अवरुद्ध भएका छन्। सडक विभाग तथा मातहतका कार्यालय र स्थानीय सरकारको पहलमा सडक सञ्चालनमा ल्याउने काम तीव्र भइरहेको छ।
सडक विभागले पछिल्लो पटक बुधबार बिहान ९ बजे अद्यावधिक गरेको तथ्यांक अनुसार अहिले ३ वटा राजमार्गहरु अवरुद्ध छन्।
जसमा मेची राजमार्ग, तमोर करिडोर र कोशी राजमार्ग रहेका छन्। यसैगरी विभागमा विभिन्न राजमार्गका १३ वटा ठाउँमा सवारी एकतर्फी मात्रै सञ्चालनमा आएको छ।
विभागले जारी गरेको सूचना अनुसार केचना-चन्द्रगढी-चारआली-इलाम-फिदिम,गणेशचोक-ताप्लेजुङ-ओलाङचुङ्गोला, चतरा-मूलघाट-माझीटार-अमरापुरडाँडा-गणेश चोक, रानी-विराटनगर-इटहरी-धरान-धनकुटा-हिले, लेघुवाघाट-तुम्लिङटार-खाँदबारी-नुम-किमाथांका, तानसेन-रिडी-कोरला र डुम्रे-बेशीसहर-चामे, बेलहिया, भैरहवा-बुटवल-वर्तुङ-राम्दी-स्याङ्जा-पोखरा खण्ड पनि एकतर्फी सञ्चालनमा रहेको छ।
विभागका अनुसार सडक अवरोध भइका ५७ ठाउँमा सवारी सञ्चालन भइसकेको र लगातारको वर्षाका कारण ६० ठाउँमा सडक बन्द भएको थियो। विभागका अनुसार कुल १३ राजमार्गका सडकहरुमा समस्या देखिएको छ।
विभाग अनुसार यो वर्षको वर्षाका कारण अहिलेसम्म सडकमा २५ करोड रुपैयाँ बराबरको क्षति भएको प्रारम्भिक तथ्यांकन छ। २४ करोड ९६ लाख २३ हजार रुपैयाँ बराबरको सडकमा क्षती पुगेको छ।