काठमाडौं- काठमाडौं महानगरपालिकाले विश्व सम्पदा सूचीमा रहेको हनुमानढोका परिसरभित्र सवारीसाधन निषेध गरेको छ।

सम्पदाको मौलिकता जोगाउन महानगरपालिकाले उक्त निर्णय गरेको हो। 

वसन्तपुर हनुमानढोका क्षेत्रको वातावरण शान्त, स्वच्छ र सुरम्य आवश्यक रहेकाले उक्त क्षेत्रभित्र सवारी साधनहरुलाई निषेध गरिएको महानगर प्रमुख बालेन शाहले बताए।

‘काठमाडौं मुख्यरुपमा प्राचिन र ऐतिहासिक कालीगढीको उदाहरण हो। काठमाडौंको पहिचान भनेकै यहाँका सम्पदाहरु हुन्। विश्वलाई गौरवसाथ देखाउन सक्ने, हामीले शानसँग व्यावसायिकता अँगाल्न सक्ने भनेकै यीनै सम्पदा हुन्,' उनले भने, 'यीनीहरुको मौलिकता, सौन्दर्य र परिसरको वातावरण शान्त, स्वच्छ र सुरम्य हुन अत्यावश्यक छ।’