काठमाडौं- उद्योगी तथा नेपाली काँग्रेसका सांसद विनोदकुमार चौधरीले ९ खर्बको हाराहारीमा मात्रै राजस्व संकलन हुनु र सरकारको साधारण खर्च १० खर्बभन्दा बढी हुनुले गम्भीर स्थिति आएकाे संकेत गरेको बताएका छन्।

उनले सरकारको राजस्व संकलनको अवस्था डरलाग्दो रहेको समेत बताए। मंगलबार प्रतिनिधि सभाअन्तर्गतको अर्थसमितिको बैठकमा बोल्दै सांसद चौधरीले सरकारले नै मुलुकको अर्थतन्त्र चलायमान बनाउन नसकेको स्वीकार गरेकाले अर्थतन्त्र चलायमान बनाउनेतर्फ सरकारको ध्यान जान आवश्यक रहेको बताए।

राष्ट्र बैंकले लगायको आयात प्रतिबन्ध खोल्ने काम भएपनि आयात बढ्न नसक्दा समग्र अर्थतन्त्र चलायमान हुन नसकेको उनको भनाइ छ। उनले अर्थतन्त्रमा देखिएका समस्या र चुनौतीका कारण देशभित्र लगानी बढ्न नसकेको उल्लेख गरे।

सांसद चौधरीले वर्तमान सरकार अर्थतन्त्र चलायमान बनाउने, लगानीमा वृद्धि गर्ने र कष्ट अफ डुईङ बिजनेस घटाउन विशेष ध्यान दिनुपर्ने बताए। ´हामी सबैले स्वीकार गरेका छौँ, अर्थतन्त्र अझै पनि चलायमान भएन। राष्ट्र बैंकले लगाएको आयात प्रतिबन्ध खोल्ने काम पनि भयो', सांसद चौधरीले भने।

अर्थतन्त्रलाई चलायमान बनाउन लगानी बढाउनेतर्फ अग्रसर हुनुपर्ने उनले बताए।