कञ्चनपुर- आन्तरिक राजस्व कार्यालय महेन्द्रनगरको राजस्व संकलन वृद्धि भएको छ। कार्यालयका प्रमुख कर अधिकृत डमरुप्रसाद पराजुलीका अनुसार  कार्यालयले आर्थिक वर्ष २०८१/८२ मा दुई अर्ब ४१ करोड ७९ लाख ५८ हजार राजस्व संकलन गरेको हाे।

अघिल्लो आवमा कार्यालयले दुई अर्ब ३९ करोड चार लाख २२ हजार राजस्व संकलन गरेको थियो। यसपटक आयकरमा १३ प्रतिशतले राजस्व संकलनमा वृद्धि भएको छ। प्रमुख कर अधिकृत पराजुलीका अनुसार आव २०८१/८२ मा ८५ करोड आठ लाख ६५ हजार रुपैयाँ आयकर संकलन भएको छ।

अघिल्लो आवमा ७५ करोड एक लाख ७२ हजार रुपैयाँ आयकर संकलन भएको थियो। त्यसैगरी, ब्याजकरमा पनि २२ प्रतिशतले वृद्धि भएको छ। कार्यालयले आव २०८१/८२ मा दुई करोड ८९ लाख ५४ हजार रुपैयाँ राजस्व संकलन गरेको छ।

अघिल्लो आवमा दुई करोड ५२ लाख ५० हजार संकलन गरेको थियो। घरबहाल कर १२ दशमलव पाँच प्रतिशतले वृद्धि भएको छ। कार्यालयले आव २०८१/८२ मा एक करोड ३७ लाख ८० हजार रुपैयाँ घरबहाल कर संकलन गरेको छ।

अघिल्लो आवमा एक करोड २२ लाख ७७ हजार घरबहाल कर संकलन गरेकामा कार्यालयले भ्याटमा ६० करोड ८८ लाख ६१ हजार र अन्तःशुल्कमा ९० करोड ९१ लख ७१ हजार रुपैयाँ राजस्व संकलन गरेको छ। ‘यो आवमा आयकर बढेको छ, भ्याटमा कम छ’ प्रमुख कर अधिकृत पराजुलीले भन्छन्, ‘अन्तशुल्क कर बराबरी छ समग्रमा गत आवको तुलनामा राजस्व संकलनमा वृद्धि भएको छ।’

कार्यालयको १३ करोड रुपैयाँ राजस्व बक्यौता रहेको छ। ‘भ्याटमा ९ करोड र आयकरमा चार करोड रुपैयाँ बक्यौता बाँकी छ’ उनले भने, ‘बक्यौता रकमका लागि करदातालाई पसलमै गएर, फोनबाट जानकारी गराउने गरेका छौँ।’

करदातालाई पटकपटक बक्यौता तिर्न प्रेरित गर्ने र नतिर्ने करदाताको पत्रपत्रिकामा सूचना निकाल्ने गरेको प्रमुख कर अधिकृत पराजुलीकाे भनाइ छ। ‘पटकपटक ताकेता गर्दा पनि अटेरी गर्ने करदातालाई पत्रपत्रिकामा सूचना निकाल्ने र समयमै बक्यौता नतिर्नेको बैंक खाता रोक्कासमेत हुनसक्छ’ उनले भने। रासस