काठमाडौं- भ्रष्टाचार गरेको अभियोगमा अख्तियार दुरुपयोग अनुसन्धान आयोगले सुर्खेतको पातालगैरी सामुदायिक वन उपभोक्ता समितिका पदाधिकारी र उपभोक्ताविरुद्ध सोमबार विशेष अदालतमा मुद्दा दायर गरेको छ।
आयोगले पातालगैरी सामुदायिक वन उपभोक्ता समितिका अध्यक्ष हरि दमाइँ, कोषाध्यक्ष खड्गप्रसाद जैसी र सचिव पूर्णिमा शाह सिंहविरुद्ध १८ लाख ७७ हजार रुपैयाँ बराबरको बिगो भराउन माग गर्दै मुद्दा दायर गरेको हो।
सोही उपभोक्ता समितिका सदस्य रणबहादुर बडुवाल विरुद्ध ५ लाख ५० हजार रुपैयाँ र अर्का सदस्य भरतबहादुर शाहीविरुद्ध १ लाख ५० हजार रुपैयाँ, सो वन समूहका उपभोक्ता प्रेमबहादुर सिजापतिविरुद्ध पनि ८ लाख ८७ हजार रुपैयाँ बराबरको बिगो भराउन माग गरिएको छ।
यसैगरी उपभोक्ता हस्तनादेवी शाही विरुद्ध एक लाख १५ हजार रुपैयाँ र अशोक सिंहविरुद्ध २५ हजार रुपैयाँ बराबरको बिगो माग गरिएको आयोगका प्रवक्ता नारायणप्रसाद रिसालले जानकारी दिए।
सेवाग्राहीसँग आठ हजार घुस लिएको अभियोगमा वैदेशिक रोजगार कार्यालय ताहाचल काठमाडौँमा कार्यरत नायब सुब्बा दुर्गाप्रसाद पोखरेलविरुद्ध पनि आयोगले आजै विशेष अदालतमा मुद्दा दायर गरेको छ। कार्यालय परिसरमा रहेको फोटोकपी सञ्चालकसँगको मिलेमतोमा नायब सुब्बा पोखरेलले घुस लिएको आरोप लागेको छ। रासस
