काठमाडौं – सिभिल सहकारीका अध्यक्ष केशवलाल श्रेष्ठले सिभिल सहकारीमा आफू नाम मात्रको अध्यक्ष भएको बयान दिएका छन्। प्रहरीका अनुसार उनले आफू नाम मात्रैको अध्यक्ष बसेको र सबै कारोबार सिभिल ग्रुपका अध्यक्ष इच्छाराज तामाङले गर्ने गरेको बताएका हुन्।
उनले सहकारीमा अध्यक्ष भए बापत आफूले २ लाख तलब लिने गरेको बयान दिएका छन्। इच्छाराजले भने ५ लाख तलब खाने गरेको र सबै कार्यकारी अधिकार आफैँमा निहित गरेको पनि श्रेष्ठले बयानमा उल्लेख गरेका छन्।
श्रेष्ठले इच्छाराज तामाङले अजेयराज सुमार्गीलाई चाइना टाउनमा रहेको भवन १ अर्ब २५ करोडमा बिक्री गरेको पनि बयानमा जनाएका छन्।
यसैगरी सिभिल सहकारीमा ३ वर्षदेखि अडिट रिपोर्ट पास हुन नसकेको र साधारणसभा पनि नभएको जनाएका छन्। सिभिल सहकारीबाट सिभिल ग्रुपअन्तर्गतका प्रोजेक्टमा भएको लगानी भने कानुनअनुसार नै रहेको उनको दावी छ।
यसैगरी उनले आफूले चेकमा हस्ताक्षर गरेर छाड्ने गरेको र कारोबार इच्छाराजले नै गर्ने गरेको पनि उल्लेख गरेका छन्।
